जेठ १८, कैलाली । कैलालीको गौरीगंगा नगरपालिकामा जुवातास खेलिरहेको अवस्थामा प्रहरीले ९ जनालाई नगद र अन्य सामग्रीसहित रंगेहात पक्राउ गरेको छ।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) योगेन्द्र तिमिल्सिनाका अनुसार गौरीगंगा नगरपालिका–४ राजिपुरस्थित बझाङ्गी टोलमा आइतबार साँझ विशेष सूचनाका आधारमा प्रहरीले छापा मारेको थियो।
विशेष सुराकीको आधारमा जिल्ला प्रहरी कार्यालयका वरिष्ठ प्रहरी नायब निरीक्षक (सई) लोकेन्द्र बहादुर चन्दको कमाण्डमा प्रहरी टोली खटिएको थियो। उक्त टोलीले आइतबार साँझ साढे ६ बजेतिर स्थानीय जगत धामीको दुईतले पक्की घरमा छापा मारेको हो।
घरको माथिल्लो तलाको बैठक कोठामा जुवा खेलिरहेको अवस्थामा प्रहरीले उनीहरूलाई नियन्त्रणमा लिएको हो। जुवाको खालबाट प्रहरीले निम्नलिखित सामग्री नगद १ लाख ७९ हजार २० रुपैयाँ तास ४ गड्डी मोबाइल फोन ८ थान बरामद गरेको छ ।
प्रहरीका अनुसार पक्राउ पर्नेमा घरधनीसहित विभिन्न स्थानका व्यक्तिहरू रहेका छन्। पक्राउ पर्नेहरूको विवरण यस प्रकार छ:
गौरीगंगा नगरपालिका–४ का (स्थानीय): घरधनी ४८ वर्षीय जगत धामी, २९ वर्षीय कृष्ण गुरुधामी, ३७ वर्षीय खेमराज पोखरेल, ३५ वर्षीय शंकर धामी र ३० वर्षीय गोपाल साउँद गौरीगंगा नगरपालिका–१ का ३४ वर्षीय प्रकाश भुल चुरे गाउँपालिका–१ का ४४ वर्षीय जयबहादुर बोहरा धनगढी उपमहानगरपालिका–३ का ६६ वर्षीय तेजबहादुर बोगटी र पुर्चौंडी नगरपालिका–८, बैतडीका ५० वर्षीय कालु सिंह धामी रहेको जनाईएको छ ।
कानुनी कारबाहीको प्रक्रिया सुरु :
पक्राउ परेका नौै जनालाई नै हिरासतमा राखी थप अनुसन्धान र कानुनी कारबाही अगाडि बढाइएको प्रहरीले जनाएको छ। डीएसपी तिमिल्सिनाका अनुसार उनीहरूलाई थप कारबाहीका लागि इलाका प्रहरी कार्यालय मालाखेती पठाइएको छ र जुवा ऐन अन्तर्गत मुद्दा चलाउने तयारी भइरहेको छ।
